​Nasungkit ng Perpetual Help ang kanilang unang panalo sa Group B matapos pabagsakin ang Emilio Aguinaldo College, 83-72, sa NCAA Season 102 men’s basketball tournament sa San Juan Arena. 

​Bumangon ang Altas mula sa kanilang pagkatalo sa opening day kontra Letran upang iangat ang kanilang rekord sa 1-1 ngayong maagang yugto ng season.

​Tanging isang puntos lamang ang kalamangan ng Perpetual sa simula ng ikaapat na quarter, 62-61, bago kumana ng 9-0 run na tinapos ng isang triple ni Rey Maglupay sa 6:02 mark para sa 71-61 bentahe.

​Hawak na ng Altas ang laro sa huling bahagi ng yugto, 79-67, ngunit gumawa ng mabilis na limang sunod na puntos ang Generals para mabawasan ang lamang sa pito, 79-72, sa nalalabing 1:57 minuto.

​Gayunpaman, tuluyang sinelyuhan ni Mark Gojo Cruz ang panalo para sa Generals sa pamamagitan ng isang short stab upang ibalik ang sapat na layo ng Perpetual, 81-72, sa natitirang 1:47 ng laro.

​“Nagpe-prepare kami na lahat ng games na ilalaban namin ay dikitan talaga,” ani Gojo Cruz matapos magtala ng 15 puntos, anim na assists, at apat na rebounds sa kanilang panalo.

​“Thankful kami na kung ano ’yong tina-trabaho namin sa practice, nagawa namin sa crunch time. Thankful kami na nanalo kami pero sana tuloy-tuloy pa kasi mahaba pa ‘tong season.”

​Pinangunahan ni Angelo Gelsano ang scoring para sa Altas sa pamamagitan ng double-double na 17 puntos at 10 rebounds. Sumunod sa kanya si LA Casinillo na may 16 puntos, habang nag-ambag sina Juan Tulabut at Maglupay ng 15 at 11 puntos ayon sa pagkakasunod.

​Tumapos si EJ Castillo na may 19 markers at limang boards sa unang laro ng EAC ngayong season. Nag-ambag naman si Harvae Raymundo ng 17 puntos sa kanilang pagkatalo.