Bakit kailangang ipagpaliban?
ANG Republic Act No. 12326 ay ang batas nagpaliban sa Barangay and Sangguniang Kabataan Elections 2026.
Dahil sa batas na ito ay ililipat sa Nobyembre 2028 ang susunod na BSKE.
Itinakda rin sa nasabing batas ang limang-taong termino para sa mga opisyal ng barangay at Sangguniang Kabataan.
Mayroong abogadong naghain ng ‘Petition for certiorari and prohibition’ kalakip ang kahilingan na mag-isyu ang Korte Suprema ng TRO o Temporary Restraining Order para pigilan ang implementasyon ng Republic Act No. 12326.
Sinasabing ang pagpapaliban ng halalan ay malinaw na paglabag sa karapatan ng mamamayan upang makapamili ng mamumunong mga lider ng barangay lalo at masyadong mahaba na ang termino ng mga opisyal bunsod sa pauli-ulit na pagkaudlot ng halalang ito.
Kung may nakalaan naman na pondo para sa taong ito ay bakit kailangang ipagpaliban at sa 2028 pa isasagawa?
Kung gagawin sa darating na Nobyembre ang eleksiyon ay doon simulan ang pagbilang ng limang-taong termino ng mga mananalo.
Paglantad ng katotohanan at kasinungalingan
LIE detector test, pagsalang sa eksaminasyon upang matukoy ang pagsisinungaling.
Ang makina ay nagkakabit ng mga monitor sa katawan para masubaybayan ang mga vital sign.
Isasagawa na ang mga pagtatanong na sa umpisa ay madadali o simple lamang hanggang sa dumating sa malalim o mga pangunahing katanungan.
Nasa punto na ng maselan o mga tunay na tanong kaya titingnan ng tagasuri kung magkakaroon ng biglaang pagtaas sa antas ng stress, tibok ng puso, o pagpapawis.
Ang mga ganitong senyales ay sinasabi o itinuturing na isang pagsisinungaling.
Pero ang makina ay hindi natutukoy ang katotohanan dahil ang sinusukat lamang nito ay ang stress at pagkabalisa.
Kaya naman maaaring bumagsak o hindi makapasa rito ang taong walang kasalanan dahil lamang sa pagkakaba o nerbiyos.
Hindi pinahihintulutan ang mga resulta nito bilang ebidensya sa mga paglilitis na kriminal dahil bukod sa hindi ito maaasahan ay hindi rin kinikilala ang lie-detector test bilang may kredibilidad na siyentipiko.
Sabi nga, ang mga taong madalas magsinungaling o bihasa sa panlilinlang sa iba ay karaniwang mas madaling nakakapasa sa polygraph test. Ulitin lamang natin, dahil nakadepende ang makina sa pagsukat ng emosyonal na pagkabalisa sa halip na sa mismong katotohanan.
Ibig sabihin, ang sino mang nakakapigil sa kanilang pisikal na pagkabalisa o nakakapag-manipula ng kanilang mga reaksyong pisikal ay maaaring makalusot sa ganitong pagsusulit.
Kung mga ganyang klase ang isasalang, ang lie detector test ay malawakang itinuturing na lubos na walang bisa.
Kumbaga ay wala ng silbi para sa kanila ang lie detector test dahil ‘mani o sisiw’ lang ito sa mga kagaya nila.
Mayroon pang mas mabisa at epektibong mga pamamaraan sa paglantad ng kasinungalingan at katotohanan kumpara sa lie detector test.
