‘Binubuhay ang bangkay’
MAYROONG kakaibang hugot ang ating bise presidente sa pagpapahayag na posibleng mangyari sa kanyang amang si dating Pangulong Rodrigo Roa Duterte ang sinapit noon na asasinasyon ng namayapang former Senator Benigno ‘Ninoy’ Aquino Jr..
Ito ay kung darating ang pagkakataon na makakabalik na ng Pilipinas ang dating pangulo.
Ang agarang impresyon kaagad sa kapaligiran ay hindi dapat ipagkumpara sina Digong at Ninoy dahil sinasabing malayung-malayo ang dalawa.
Pwedeng ikonsidera ang pahayag o pananaw ni Vice President Sara Duterte ay hindi paghahambing sa karakter o sa kung ano mang aspeto sina Digong at Ninoy bagkus ay doon lamang sa posibiidad na umano’y asasinasyon.
Gayunman sa pahayag ng gobyerno ay wala namang ano mang balita o impormasyon na mayroong pagbabanta sa buhay ni former President Duterte.
Sa puntong ito ay tanging pamilya Aquino ang marahil may karapatan na maglabas ng kanilang komento.
Kung papahabain pa ang argumento ng nasa paligid ay para na ring ‘binubuhay ang bangkay’ na dapat ay nananahimik na lamang at ipinagdarasal.
Mas aapaw ang mga peke
SA pagratsada ng kampanyahan para sa mga lokal na posisyon ay asahang mas madadagdagan pa ang pag-apaw ng mga peke.
Kung nangyayari sa nasyunal ay natural lamang na ganoon din sa local level.
Kapag nagsalita ang isang partido ay karaniwang maririnig sa kalaban na iyon ay mga peke lamang o walang katotohanan.
Sa madaling salita ay kanya-kanyang patutsadahan na siyempre ay pare-parehong hindi magpapadaig.
Kumbaga ay tama para sa kanya at ikaw ang mali o ikaw ang tama at siya ang mali.
Sa mga ganitong banggaan o bangayan ay ipinapakita at isinisiwalat ng magkabilang kampo ang kanilang mga pananaw.
Tinatayuan at pinaninindigan ang suporta sa kandidato na pinaniniwalaan na ang iba ay tila handa pang makipagpatayan o makipag-away.
Huwag naman sana dahil sa larangan ng pulitika ay tandaan na walang permanenteng kaibigan o kaaway bagkus ay permanenteng interes.
Paano kapag dumating ang panahon na ang mga pulitikong inyong pinag-aawayan ay magiging magkaalyado na?
Ang mahirap ay kapag nagkaroon ng lamat sa inyo na ang dahilan ay dahil sa pagbabangayan para sa mga kandidato o pulitiko.
Kung hindi inaasahan na magkakasalubong ang magkalabang kandidato sa pangangampanya ay dapat mahinahon lamang ang mga tagasuporta at iwasan ang pagpapasaring o asaran.
Iwasang buung-buo na ibigay ang sarili sa sinusuportahan at tinutulungang kandidato dahil ang pagbabago ay makikita pagkatapos ng halalan.
Halimwabang natapos na ang eleksiyon at nailuklok na sa puwesto ang nanalong kandidato ay doon na magsimulang mag-obserba.
Sa pagmamasid at sa mga bagay-bagay na masasaksihan ay saka lamang mapagtatanto ang totoo at maaaring masambit na peke pala.
Kaya lang huli na para sa pagsisisi.
