Istrikto, sana magkatotoo
ISTRIKTO na ang Department of Social Welfare and Development sa mga patakarang ipatutupad.
Ito ay may kinalaman sa kung tawagin ay ‘epal’ na pulitiko na nanghihimasok kapag ang gobyerno ay mayroong tulong na ipinamamahagi.
Sa kabila na propesyonal naman ang mga social worker ng kagawaran ay hindi sila pahihintulutang magtungo sa mga distribution site kung mayroong presensiya roon ng mga pulitiko.
Sakali naman na habang nasa kasagsagan ng pamamahagi ng tulong at bigla ay may sumulpot na pulitiko ay obligado ang kagawaran na ihinto ang aktibidad.
Apektado ang mga tao dahil lamang sa kaepalan ng pulitiko na mantakin ba naman na naghintay ng oras para makakuha ng ayuda subalit matitigil lamang.
Kung tutuusin, dapat noon pa ang pagpapatupad ng istrikto o mahigpit na mga patakaran kaya sana sa pagkakataong ito ay magkatotoo na.
Hindi dapat naghahari sa mga ganitong gawi ang mga epal na pulitiko na ang layon ay para sa sariling pagpapakilala o promosyon ng kanilang political agenda.
Sagrado na trabaho
TILA bakas sa mukha o reaksiyon ni Ombudsman Boying Remulla ang animo’y pagkagalit habang nagsasalita patungkol kay Batangas 1st District Congressman Leandro Leviste.
Galit nga ba? Kung ano man iyon ay hindi natin batid at kung mayroon nga ba talagang galit o sadyang ganon lamang ang ekspresyon ni Remulla sa pagsasalita.
Batid ko na hindi naman lingid sa inyong kaalaman ang isyung may kaugnayan dito.
Hindi po tayo tutok sa kung ano mang usapin na iyon bagkus ay mga pagtatanong.
Ang tanggapan ng Ombudsman ay masasabing kahalintulad sa piskalya.
Tatanggap ng mga reklamo at magdedetermina sa kung ano man ang magiging estado ng kaso batay sa maingat at masusing pag-aaral o pag-iimbestiga.
Hindi ba dapat ay walang kaakibat na galit ang Ombudsman laban sa kinakasuhan o maging sa naghahain ng kaso?
Paglilinaw lamang na hindi natin sinasabi na galit nga si Remulla kay Leviste na ang ating punto dapat ay neutral at mahinahon lamang.
Maituturing na ‘basag’ agad ang paggawad ng desisyon kung naghahari sa puso at isipan ang galit.
Ganon din sa mga piskal, huwes o kahit simpleng tao na kapag may kahalong galit ay sira na ang diskarte lalo na sa pagpapasya.
Ang mga katulad na tungkulin o pwesto ay sadyang sagrado na trabaho na nangangailangan ng nakabukas na puso at isipan sa hanay ng magkabilang panig na walang galit at pagkiling.
Ganon din dapat sa larangan ng pamamahayag, kaya nga tinatawag na media ay nasa gitna lamang at walang pinapanigan na dapat ay kapwa bibigyang puwang ang paliwanag ng bawat panig.
