Patuloy na pinalalawak ng CARD Bank, Inc., isang microfinance-oriented rural bank, ang mga hakbang nito upang maging mas bukas at madaling maabot ang mga serbisyong pinansyal para sa lahat, lalo na para sa mga kliyenteng may kapansanan sa pandinig o deaf clients. Sa iba’t ibang tanggapan ng bangko sa buong bansa, ipinatutupad ang mga programa at inisyatibo na naglalayong gawing mas malinaw, maginhawa, at may dignidad ang pakikipag-transaksiyon ng mga deaf na kliyente.

Maraming transaksiyon sa bangko ang nakasalalay sa pasalitang komunikasyon. Dahil dito, nagsasagawa ang CARD Bank ng mga hakbang upang matiyak na may maayos at malinaw na paraan ng pakikipag-ugnayan para sa mga kliyenteng deaf. Layunin ng bangko na tiyakin na ang bawat kliyente ay may pantay na pagkakataong makagamit ng mga serbisyong pinansyal.

Inklusibong komunikasyon

Alinsunod sa mga pambansang polisiya tulad ng Republic Act No. 7277 o ang Magna Carta for Disabled Persons, pinahusay ng CARD Bank ang mga proseso nito sa pagbubukas ng deposit account at customer verification upang maging mas inklusibo. Layunin nitong tiyakin na ang bawat kliyente ay makadarama ng pagtanggap at maayos na serbisyo mula sa unang hakbang pa lamang ng kanilang pakikipagtransaksiyon sa bangko.

Sa mga tanggapan ng bangko, may mga pasilidad tulad ng accessibility ramps at priority lanes upang mas mapadali ang pagpasok ng mga kliyenteng may kapansanan. Mayroon ding malinaw na mga paalala sa mga entrance at Customer Service Sections na nagsasaad na may pantay na akomodasyon para sa deaf clients at iba pang PWDs.

Upang mapadali ang komunikasyon, naglalaan ang mga tanggapan ng Filipino Sign Language (FSL) booklets, madaling basahing gabay tungkol sa mga produkto ng bangko, at mga instructional video na may FSL inset. Ang mga staff, kabilang ang mga guwardiya, customer service representatives, at cashiers, ay inaasahang laging may dalang papel at ballpen upang agad na makapagsagawa ng written communication kung kinakailangan.

Tinuturuan din ang mga empleyado kung paano tutulungan ang mga kliyente sa pagsagot ng mga form at pagproseso ng mga requirement habang sinusunod ang mga patakaran tulad ng Know-Your-Customer (KYC) at Anti-Money Laundering Act (AMLA). Katulad ng ibang kliyente, kinakailangan pa ring magsumite ng deaf clients ng mga karaniwang dokumento tulad ng valid ID at profile forms. Kapag naaprubahan ang kanilang aplikasyon, maaari na silang magbukas ng deposit account na may panimulang deposito na PHP 200. Sa prosesong ito, ipinakikita ng bangko na maaaring magkasabay ang accessibility at pagsunod sa mga regulasyon.

Pagbabago ng pananaw para sa inklusyon

Hindi lamang sa pisikal na pasilidad at proseso nakatuon ang inklusyon sa CARD Bank. Nagsisimula rin ito sa pagpapalawak ng kaalaman at pag-unawa ng mga empleyado tungkol sa deaf community.

Noong Hunyo 15, 2024, nagsagawa ang bangko ng isang buong araw na Deaf Awareness Seminar sa CARD-MRI Development Institute (CMDI) sa Bay, Laguna. Dumalo sa seminar ang 60 staff at faculty members na pinangunahan ng Inclusion Consultant na si Bayani Generoso Jr., kasama ang anim na Deaf teachers.

Sa seminar, tinalakay ang deaf culture, ang mga pangunahing kaalaman sa Filipino Sign Language, at ang papel ng mga hearing individuals sa pagsusulong ng inklusibong serbisyo. Ipinakita rin ang mga paraan ng visual-gestural communication, mga gabay sa paggamit ng FSL, at mga praktikal na hakbang upang gawing mas madaling maabot ang mga serbisyong pinansyal.

Sa pamamagitan ng mga interaktibong aktibidad tulad ng pagsasanay sa ekspresyon ng mukha, pag-aaral ng basic FSL signs, at mgabukas na diskusyon, nagkaroon ang mga kalahok ng mas malalim na pag-unawa sa pang-araw-araw na karanasan ng deaf community.

Ayon sa tugon ng mga kalahok, nagbigay ang seminar ng panibagong pananaw at mas matibay na pangako na maisabuhay ang inklusibong komunikasyon. Ipinakita rin nito na ang tunay na inklusyong pinansyal ay nangangahulugan ng pag-alis hindi lamang ng mga pisikal na hadlang kundi pati na rin ng mga puwang sa komunikasyon at mga lumang pananaw.

Bukas, para sa lahat

Bilang bahagi ng mga inisyatibo nito sa social responsibility, patuloy na nakikipagtulungan ang CARD Bank sa mga komunidad na kulang sa serbisyo upang mapabuti ang kanilang kabuhayan sa pamamagitan ng serbisyong pinansyal, suporta sa kabuhayan, at mga programang nagpapalakas ng kakayahan ng mga kliyente.

Binigyang-diin ni Dr. Jaime Aristotle B. Alip, Founder at Chair Emeritus ng CARD MRI, na mahalaga ang mga hakbang na ito sa pagsusulong ng inklusyong pinansyal para sa mga taong may kapansanan.

“Matagal nang malinaw ang aming misyon. Dapat maabot ng mga serbisyong pinansyal ang mga sektor na madalas na naiiwan. Ang financial inclusion ay hindi lamang tungkol sa pagbubukas ng account, kundi tungkol din sa pagbubukas ng mas maraming oportunidad,” aniya.

Samantala, muling pinagtibay ni CARD Bank, Inc. President Marivic Austria ang pangako ng bangko na magbigay ng pantay na serbisyo sa lahat.

“Kapag inaalis natin ang mga hadlang para sa mga taong may kakulangan sa pisikal na kakayahan at iba pang sektor na kulang sa serbisyo, pinagtitibay natin ang kanilang dignidad at lalo nating pinalalakas ang ating mga komunidad. Ang inklusyon ay hindi lamang isang opsyon, ito ay isang responsibilidad,” pahayag niya.

Sa kasalukuyan, ipinatutupad na ang account opening services para sa deaf na kliyente sa mga tanggapan ng CARD Bank sa iba’t ibang lalawigan, kabilang ang La Union, Pangasinan, Benguet, Ilocos Norte, Laguna, Quezon, Oriental Mindoro, Occidental Mindoro, Tarlac, Batangas, Camarines Sur, Camarines Norte, Albay, Iloilo, Leyte, Samar, Eastern Samar, Marinduque, Bohol, Antique, Capiz, Masbate, Davao del Sur, Davao Oriental, at Cotabato, pati na rin sa Metro Manila.

Kasabay nito, patuloy na nagpapakilala at nagpapalawak ang bangko ng mga deaf-friendly at inklusibong hakbang upang higit pang mapabuti ang aksesibilidad sa pagbabangko. Hanggang Enero 2026, ang CARD Bank ay may kabuuang 367 deaf clients na may aktibong account.

Sa pamamagitan ng mas madaling maabot na mga serbisyo, mas handang mga empleyado, at aktibong pakikipag-ugnayan sa komunidad, ipinakikita ng CARD Bank na ang kapangyarihang pinansyal ay hindi dapat nakasalalay sa pisikal na kakayahan. Sa halip, ito ay isang karapatang dapat bukas para sa lahat. (Jireh Pearl Casionan, Junior Writer)