100K libreng pandesal ang ipinamahagi sa World Pandesal Day sa Kamuning Bakery
Sandaang libong libreng pandesal, Eden Cheese, Clara Olé fruit jams, at iba pang pagkain ang ipinamahagi bilang pagdiriwang ng World Pandesal Day sa Kamuning Bakery and Cafe.
Ang taunang World Pandesal Day Forum ay isang pansibiko at pangkulturang proyekto upang parangalan ng tinapay ang mga Pilipino at bigyang-diin ang pangangailangang tumulong sa paglutas ng kagutuman kasabay ng World Food Day ng United Nations.
Nagpaabot ng kani-kanilang pahayag ng suporta at pagbati sina Quezon City Mayor Joy Belmonte, Education Secretary Sonny Angara, Senate President Sherwin Gatchalian, dating Senador Grace Poe Llamanzarres, First Lady Liza Araneta-Marcos, Vice President Sara Duterte, at Davao City Mayor Sebastian Duterte sa pagdiriwang ng World Pandesal Day sa Kamuning Bakery at kay Wilson Lee Flores.
Si ACT Teachers Party-List Rep. Antonio Tinio ay isa sa mga may-akda ng panukalang batas na nag-aalis ng buwis sa 13th Month Pay.
Si Rep. Tinio ay isa sa mga pangunahing may-akda ng Republic Act No. 10653, o “An Act Adjusting the 13th Month Pay and Other Benefits Ceiling Excluded from the Computation of Gross Income for Purposes of Income Taxation, Amending for the Purpose Section 32(B), Chapter VI of the National Internal Revenue Code of 1997, as Amended.”
Ang Republic Act No. 10653 ay nilagdaan bilang batas noong Peb. 12, 2015, na nagtaas ng tax-exempt ceiling para sa 13th-month pay at iba pang benepisyo mula ₱30,000 patungong ₱82,000 para sa mga manggagawa sa parehong pampubliko at pribadong sektor.
Pinuri ni Tinio si Flores para sa kanyang adbokasiya na nagdudulot ng pakinabang sa mga Pilipino at sa buong bansa.
Binanggit niya ang pagtaas ng presyo ng pagkain at mga pangunahing bilihin tulad ng tinatawag na “dog rice”.
Binigyang-diin ni Tinio na ang mahalagang gawin ay tugunan ang problema sa pagkain at ang kagutuman sa buong mundo.
Aniya, “ang problema ay tayo ang numero unong importer sa buong mundo. Dapat ay gumawa tayo ng sarili nating pagkain at makamit ang food security.”
Ang Chairman ng Movie Workers Welfare Foundation (Mowelfund) at premyadong aktres na si Boots Anson Roa ang Guest of Honor sa taunang World Pandesal Forum.
Nang tanungin kung ano ang kanyang paboritong palaman, sinabi ni Roa na buo na ang pandesal at hindi na kailangan pa ng anumang palaman.
“We are the salt of the earth. And pandesal is the favorite breakfast of Filipino families,” wika ni Roa.
Binati ni Roa si Tinio sa pagiging Kinatawan ng ACT Teachers Partylist. Naalala naman ni Tinio na noong bata pa siya ay kumakain siya ng pandesal na may peanut butter sa bahay ng kanyang lola.
Ipinunto niya na ang pinakaunang biktima ng kagutuman ay ang mga bata, na nakaugat sa patakaran ng pamahalaan sa importasyon.
”Kung tayo ay isang malayang bansa, dapat ay kaya nating magbigay ng sapat na pagkain sa ating mga kababayan at hindi umasa sa importasyon,” ani Tinio.