Paghahanda sa tagtuyot
SA kabila ng nararanasang patuloy na pag-uulan ay hindi isinasaisantabi ang mga kaukulang hakbang o paghahanda sa banta ng panibagong tagtuyot mula sa El Niño.
Kung mararanasan ang panibagong tagtuyot ay direkta itong makakasakal o gigipit sa lokal na supply ng pagkain.
Mas matinding krisis din ang posibleng maidudulot nito sa pandaigdigang merkado at presyuhan ng bigas.
Ang pamunuan ng Department of Agriculture ay nagpalabas ng direktiba sa lahat ng kanilang ahensya para sa patuloy na pag-aayos at pagpapatatag ng mga El Niño response plan.
Isa sa nakikita para mabawasan ang epekto ng tagtuyot ay ang gagawing paggamit ng DA sa mga pinakabagong datos ukol sa panahon, suplay ng tubig, galaw ng merkado, at lagay ng pananim.
Cloud seeding, pagtatayo ng solar irrigation, paglilipat ng produksyon sa hindi apektadong rehiyon at iba pang mga hakbang ang isinasaalang-alang ng kagawaran.
Mahalaga rin ang direktang tulong-pinansyal na ilalaaan sa mga naapektuhang magsasaka.
Nakakapanghinayang
NAIRAOS na ang espesyal na halalan kamakailan sa ikaapat na distrito ng Cavite, sa Dasmariñas City.
Tulad ng inaasahan ng higit na nakararami ay ang pagkakapanalo ni Jenny Barzaga.
Sa pagkakapanalong ito ay inasahan na rin ang mga negatibo at positibo na mga komento.
Hindi maiaalis iyan sa mga kwentuhan lalo na sa social media kaakibat ang magkabilang mga komento at pananaw.
Ilan sa mga negatibong puna ay hindi na umano natuto ang mga residente o botante roon.
Barzaga pa rin daw sa halip na kumuha o pumili ng iba at kung anu-ano pang negatbong komento.
Sa mga komento na positibo naman ay halos iisa ang tinutukoy na bunga ng maayos at magandang pamamalakad ang susi ng pagkakapanalo ni Jenny Barzaga.
Ang napakalaking bilang ng boto na natamo ay pagpapakita at pagpapatunay na siya ay tinatangkilik at mahal ng higit na nakararaming residente ng Dasmariñas City.
Para sa hindi nakakabatid bakit nagkaroon ng special election ay upang mapunan ang nabakanteng puwesto matapos ang pagpapatalsik noon ng Kamara kay dating Congressman Francisco ‘Kiko’ Barzaga.
Tingnan mo nga naman, nagkaroon noon ng botohan sa Kamara na nagresulta sa kapasyahang pagpapatalsik sa dating mambabatas.
Botohan naman ang naging kasagutan sa pamamagitan ng special election na hindi biro ang halagang nagasta rito ng gobyerno.
Milyones ang sinasabing iginugol sa nasabing espesyal na halalan na sadyang nakakapanghinayang.
Dahil kinatawan na ng ikaapat na distrito ng Cavite si Hon. Jenny Barzaga ay bago na ang alkalde ng lungsod sa katauhan ni Hon. Third Barzaga at ang bise-alkalde naman ay si Hon. Rudy Lara.
